कुळी कन्या पुत्र होती जे सात्विक...

सदरील लेख हा दै.लोकनेता मध्ये दिनांक १७ फेब २०१८ रोजी प्रसिद्ध झालेला आहे .

महाराष्ट्रात अनेक मोठे नेते होऊन गेले / आहेत . बर्‍याच नेत्यांनी आपली पुर्ण ताकद लावून राजकारणात सक्रिय केले परंतु त्यांच्या मुलांना बाप कमाई सोडता आपला स्वतःचा असा वेगळा ठसा काही उमटवता आला नाही . आज त्यातले बरेच सपशेल अपयशी ठरले आहेत तर काही जन तर आपल्या वडिलांच्या राजकीय अपयशाचे कारण सुध्दा बनले आहेत . मात्र लोकनेते स्व.गोपीनाथराव मुंडे साहेबांचे वारसदार मात्र याला अपवाद ठरले आहेत . महाराष्ट्रात इतर कोणत्याही राजकीय नेत्याच्या वारसदारांपेक्षा मुंडे साहेबांच्या मुलींनी आपले कर्तुत्व सिध्द करून स्वतःचे एक वेगळे स्थान निर्माण केले आहे.

पंकजाताईंनी महाराष्ट्राच्या मंत्रिमंडळातील सर्वात कार्यशील आणि कर्तबगार मंत्री म्हणून नावलौकिक मिळवला आहे . लोकहिताच्या दृष्टीने दुष्काळमुक्तीसाठी वरदान ठरलेल्या जलयुक्त शिवार सारख्या योजनांमुळे त्यांचे देशभर झालेलं कौतुक हे त्याचंच एक उदाहरण म्हणता येईल. जलयुक्त शिवार योजनेचे देशभर फक्त कौतुक झाले नाही तर जलयुक्त शिवार हे दुष्काळमुक्तीचे वरदान म्हणून देशभर त्याचे अनुकरण सुध्दा केले जात आहे.  महाराष्ट्र भाजपातील सर्वात जास्त जनाधार असलेल्या प्रभावशाली लोकनेत्या म्हणून अल्पावधीत त्यांनी स्वतःला सिध्द केले आहे . याचा साधक परिणाम म्हणून त्यांना जसा फायदा झाला तसा बाधक परिणाम म्हणून त्यांच्यावर खोटे आरोप सुध्दा झाले परंतु या खोट्या आरोपांचा त्यांना राजकीय दृष्टीने खंबीर होण्यासाठी फायदा सुध्दा झाला आहे . असो , पंकजाताई या मुंडे साहेब हयात असतानाच राजकीय दृष्ट्या सक्रिय होत्या . परंतु साहेबांच्या जाण्यानंतर अपघाताने राजकारणात आलेल्या खासदार डाॅ.प्रितमताई सुध्दा आपली एक वेगळी ओळख निर्माण केली आहे.

लोकनेते स्व.गोपीनाथराव मुंडे साहेबांच्या नंतर अपघाताने राजकारणात आलेल्या खासदार डाॅ.प्रितमताई यांनी बर्‍याच राजकीय विश्लेषकांचे अंदाज अक्षरशः खोटे ठरवले आहेत . देशाच्या इतिहासातील लोकसभेत विजय मिळवण्याचे सर्वच्या सर्व विक्रम पदार्पणातच मोडून काढत आजवरच्या सर्वाधिक मते मिळवून आणि सर्वाधिक फरकाने विजय मिळवून लोकसभेत जाण्याचा विश्वविक्रम करत लोकसभेत पोहोचलेल्या खासदार डाॅ.प्रितमताई मुंडे यांच्या समोर खुप मोठे आव्हान होते. कारण , मुंडे साहेबांचा वारसा खुप मोठा होता आणि साहजिकच त्यामुळे लोकांच्या अपेक्षा सुध्दा राजकारणात नवख्या असलेल्या प्रितमताईंवर खुप जास्त होत्या .

मुंडे साहेबांनी नेहमीच लोकसभेत शेतकरी , शोषित,  वंचित बहुजन समाजाच्या प्रश्नावर आवाज उठवण्याचे काम केले होते आणि म्हणून देशभरातील बहुजन समाजाने त्यांना आपला नेता मानलं होतं . आणि खा.डाॅ.प्रितमताईंवर या सर्व अपेक्षांचे ओझं होतं , जे त्यांनी लीलया अतिशय चांगल्याप्रकारे पेलले आहे असे म्हणता येते .


सत्ताधारी पक्षाच्या खासदार असताना सुध्दा त्यांनी शेतकऱ्यांच्या आणि सामाजिक प्रश्नांवर लोकसभेत नेहमीच आवाज उठवला आहे . तर सत्तेचा फायदा जास्तीत जास्त प्रमाणात कसा करता येईल या दृष्टीने विचार करत आज महाराष्ट्रात इतर जिल्ह्यांच्या तुलनेने सर्वाधिक जास्त निधी बीड जिल्ह्यात खेचून आणला आहे . अनेक दशकांपासून बीड जिल्ह्य़ातील लोकांचे स्वप्न असलेल्या रेल्वेचा प्रश्न जवळपास मुंडे भगिनींनी निकाली लावला आहे.

शांत आणि प्रांजळ स्वभावाच्या खासदार प्रितमताईंची काम करण्याची पध्दत अतिशय वेगळी आहे . एखादे काम हाती घेतल्यानंतर ते संपूर्ण निकाली लागेपर्यंत ताई त्याचा पाठपुरावा करणे सोडत नाहीत. बीड रेल्वे साठी त्यांनी वारंवार केलेला पाठपुरावा हे त्याचे एक उदाहरण म्हणता येईल . मागच्या वेळी परळीत स्वतः तात्कालिन रेल्वेमंत्री सुरेश प्रभु यांनी खासदार डाॅ.प्रितमताई मुंडे यांचे केलेले कौतुक त्यांच्या कार्याचे प्रमाणपत्र आहे .


आज खासदार डाॅ.प्रितमताई गोपीनाथ मुंडे यांचा वाढदिवस,  मुंडे साहेब गेल्यापासून प्रथमच साजरा करण्यात येत आहे . फक्त लोकनेते स्व.गोपीनाथराव मुंडे साहेबांची मुलगी एवढीच ओळख न ठेवता आपले एक वेगळे अढळ स्थान निर्माण करणार्‍या   अल्पावधीत लोकप्रिय झालेल्या खासदार डाॅ.प्रितमताई मुंडे यांना उदंड आयुष्य लाभो आणि लोकनेते स्व.गोपीनाथराव मुंडे साहेबांचे स्वप्न पुर्ण करण्यासाठी इश्वर त्यांना शक्ती देवो हिच इश्वरचरणी प्रार्थना.

शेवटी संत तुकारामांचा अभंग आठवतो...

आपोलिया हिता , जो असे जागता !!
धन्य माता पिता , तयाचिया !!
कुळी कन्या पुत्र,  होती जे सात्विक !!
तयाचा हरीक , वाटे देवा !!


- संदीप नागरगोजे, गंगाखेड